Брз појадок со тортиљи

Потребни состојки за 4 големи тортиљи
3 јајца
1 домат
220 гр шункарица
180-200 гр кашкавал
сол, пимент, италијански зачини

Со вилушка изматете ги јајцата, посолете и додадете малку пимент или црн бибер. Јас биберот го заменувам со пимент заради иритација во желудникот. Кашкавалот изрендајте го, а шункарицата да е исечена на тенки кругови. И доматот исечкајте го на потенки кругови.

Ќе ви треба нелеплива тава за оваа вкусотија која ќе ја премачкате со путер и над него ќе ставите малку помалку од половина од матените јајца. Извртете ја тавата насекаде по дното да има.
Врз нив ставете една тортиља, а врз неа наредете шункарица и посипете со ренданиот кашкавал и италијанскиот зачин, па поклопете со уште една тортиља. Врз таа тортиља наредете ги круговите домати и посипете ги со рендан кашкавал и италијанскиот зачин. Поклопете со тортиља врз која ќе наредите исто како првиот пат со шункарицата и завршете повторно со тортиља.
Врз неа распоредете го остатокот од разматените јајца насекаде.

Поклопете ја тавата со капак и ставете ја на загреана рингла на ниска температура. Кај мене од 9 можни, се печеше на 5ка. По правило треба така да се пече 5 минути, но јас секогаш пролонгирам. Всушност се водам на мирисот. Кога ќе ми замириса на печено, се отвора капакот и се превртува од другата страна. Повторно поклопете и оставете 5 минути.

Leave a Reply

Your email address will not be published.